[mmund]
text: rainer krispel 1997
musik: werner puntigam/richard klammer 1997
all rights reserved by: non food factory 1999
noch einen schluck tee mit rum
des gelbe blechhäferl abgstellt
am sessel mit dem wunderbaren
blumerlbezug
knapp der versuchung wiederstanden
mir die wunderbare gibson-guitar
die links hinter mir steht
in kniehöhe umzuhängen
jetzt fang i dann an
punkt
punkt
punkt
nach dem letzten von die drei punkte
so ein
eckiges
klammerzeichen
des is so bald im text jetzt natürlich
a bissl hinterfotzig aber
da fehlt etwas
der plan is ja
dass i mi von der
ringenden
hardcore-diktion löse
des is natürlich leicht
und schnell
g'sagt
i arbeit scho seit jahren
an einem
also nur einem
wirklich guten
wirklich lustigen
unblöden
text
der
uplifting
inspirierend
ist
aber der aufwand
den ma da treibt
der kommt ja net so leicht zruck
scho gar net von so am kritiker
aber i werd da jetzt trotzdem
a bissl
zärtlicher
drüberkrispeln
's is a leicht
weil i mach des jetzt
nur
mit meiner stimme
zu am loop
die stimme
das loop
i in diesem aufnahmeraum
vor diesem mikrofon
so aufnahmeräume
also wenigstens die
die i in meim leben kennenglernt hab
ham immer so a bissl was von
unter
wasser
flair
tauch
experience
i war in a'm so an studio
im inner ear studio
in arlington virginia
in
amerikanien
und dort hat der
findige studiobetreiber
und tontechniker
der für mi ziemlich legendäre
don cientara
diesen eindruck noch verstärkt
also von der deckn
von diesem aufnahmeraum
hängt a surfbrett aba
auf diesem surfbrett
san a paar stofftiere drapiert
die also jetzt quasi
den aufnehmenden menschen
mit einer unendlichen
stofftierlichen geduld
zuaschaun
und da hinter der scheibn
sitzt dann quasi
der commander
irgendwie so a bissl
der is da so bissl
am steuerrad
und ihr da draussn
ihr sads trocken
und i surf da jetzt
durch mein collegeblock
und mein twisted kopf
dass i da so an text find
den i da jetzt
quasi
drüberkrispel
aber
warum ma da in virginia warn
also des studio des war so a bissl so a
jugendtraumerfüllung
weil dort san die meisten von unsre
also i hab damals in aner band gspüt
von unsre lieblingsplatten aufgnommen wordn
des war so
amerikanischer
hardcore
aus washington dc
also ane von die musiken
die ja im
öffentlich rechtlichen rundfunk
in diesem land mit dem A
ja eigentlich net
vorkommen san
weil
auftrag is auftrag
schauns
jetzt fang i scho wieder zum ringen an
weil a bissl rafn muass immer sein
andrerseits
jede paranoia zahlt si aus
und
es is ja a so
dass da jetzt unpackbar viel
bilder bei mir san
die i loslassn kann
und
soll i euch
mit anekdoten
totschmeissn
es is a sowieso so
dass nachher no mehr dazua kommt
also a so
musik
garantiert
weil die musik is ja nie fertig
und der text is eigentlich a nie fertig
und aus höflichkeit oder konvention
wobei letzteres natürlich der üblere grund war
wird beides gelegentlich unterbrochen
aber ausnahmsweise
solten wir uns nicht falsch verstehn
ich will hier nicht raus
nein ich will hier nicht raus
dieses eine mal
will ich hier gar nicht raus
umblättern
zum schreien
fehlt mir a a bissl die wut
weil mit linz und mir
wo ma da jetzt so san
in linz
des san so gschichtn
i bin da ja schliesslich aufgwachsn
und wir nehmen da jetzt quasi
im herz
oder im vergangenen herz
von der stadt da auf
und irgendwie
hauts ma da natürlich so
archetypische
prototypische bilder aufa
die sozialisten als die
lieben götter
dieser stahl und arbeiterstadt
mit dem allmächtigen bundeskreisky
steh uns bei
und die voest alpine stahlwerke
als ihr pumpendes
pump pump pump
stinkendes herz
und der
mittlerweile aufgelöste
sk voest linz
als seine
als linz'
toreschiessende propheten
des is lang her
ja
des braucht ja
bis ma an überblick kriegt
und des alles a bissl durchschaut
und also irgendwie
eigentlich wollt ma ja nach
schrattenberg in der steiermark
vorproduziern fahrn
aber des war net
jetzt war ma in der kapu
und die kapu
is so irgendwie
des wirkliche herz
von dem linz
des mir wichtig is
und des war irgendwie dann doch
der totale nostalgieflash für mi
da könnt i euch jetzt no amoi
mit anekdoten totschmeissn
die kapu is so a
sag amoi gewesenes
jugendzentrum
und des ham wir
und wir in anführungszeichen
wir warn punkrocker
hardcores
als spüwiesn entdeckt
ham dort unsre konzerte veranstaltet
nirvana
vor sechzg leut
aner der wenign kapu gigs
den i net gsehng hab
green day
vor achzg leut
die kapu bälle
selber schuld
wer in der früh noch
stehn kann
und
der trouble mit der police
also wie die hiphopper sagn
also der scheiss mit der polizei
und es is scho so irgendwie dass
mi hat mit vierzehn
weil i a punkrocker war
a polizist kontrolliert
weil i mit an irokesen
vor einem noch nicht geöffneten plattengeschäft
in der adlergasse
gstandn bin
un da fangt ma si so sachn zum fragn an
und in der kapu warn a so gschichtn
wie
naja
i bin scho wieder beim ringen und beim reklamiern
also lieber die
die liabn gschichtn
wir ham dann a alle unsere eigenen bands ghabt
und
naja des war a wichtiger beitrag zur überwindung
des linz in uns
weil so a band hat den vorteil
dass ma nicht nur mädchen
was ja angeblich
und ziemlich sicher
a ziemlich guater grund is
für viel junge und ältere männer
überhaupt sich in bands zu organisieren
also eben
mädchen kennenlernt
dass ma auch
im günstigsten fall
amal seine eigenen
stomping grounds
verlassn kann
und a bissl sieht
wie des woanders is
und
danach is dann irgendwie
langweilig
des war
anführungszeichen
normales leben
und für das grundlegende konzept
von dieser kapu
von der jetzt die rede war
hats sogar an preis gebm
für dieses konzept
doppelpunkt
institutionalisierte jugendarbeit
mit offener jugendarbeit
der offene teil warn wir
zu verbinden
so hat mir der karl
charly blecha
vor versammelter roter linz prominenz
also mir und andere kapu menschen
die hand geschüttelt
i hab mas net net gwaschn
ich will hier nicht raus
ich muss hier gar nicht raus
nein ich will hier gar nicht raus
ich muss hier gar nicht raus
i schreib ja a immer
grundsätzlich
an so am essay über
politische musik
natürlich
jetzt lachen scho wieder alle
und wirklich
kaum will ma sich von dieser
von diesem anspruch
irgendwie lösen
den überdenken
wird ja die musik
eigentlich gleich wieder politisiert
des is ja so quasi in die
fast aner wochn die ma jetzt da warn
wieder passiert
wiel ma kommt ja gar net dazu
dass ma inhalte formuliert
strukturen schaffen anfangt
die diese inhalte transparenter machen
mehr umsetzen
weils ja genug
koffer gibt
denen quasi die blosse existenz
von so dingen wie der kapu
a neunzehnhundertsiemaneunzg
immer no a problem is
und
des scheisst mi halt scho an
also wamma si überlegt
dass ja a der rock'n'roll
a gschicht von fuffzg jahr hat
dass des no immer menschn einfach net kapiern
und sein lassn können
da bin i scho wieder
beim ringen und beim rafn
und i wünscht
i würd a paar schmutzige tricks kennen
dass i mit die leut
a bissl erfolgreicher rafn kunnt
weil da will ich schon raus
da will ich schon raus
ganz schnell raus
baby baby ganz schnell raus
i walked with the
sozialpartnerschaft
i walked with the
sozialpartnerschaft
jetzt hört des dann
bald auf glaub i
i hab ja a ka uhr
wass i net wie lang des no dauert
des war jetzt wieder a schluck vom
scho bestens eingführtn
tee mit rum
der is jetzt scho a bissl auskühlt
auf diesem sessel
es a so
wann i den collegeblock
jetzt umbladlt
steht eigentlich nix mehr drauf
aber
is a irgendwie wurscht
es is auf jeden fall
zusammenfassend
also zusammenfassend is ja immer gut
so
dass mir dieser ganze
musikwahnsinn
eigentlich mit einer
unpackbaren wahrscheinlichkeit
so ziemlich alles an
erlebensfähigkeit
sielebensfähigkeit
eslebensfähigkeit
gebm hat
what i have got
da san irgendwie so
hunderttausend momente
bei hunderttausend konzerte
hunderttausend gschichtn wie
der andi der unterm auto schlaft
der albino der nach aner nacht
sein zähn nimmer findt
seine zwa vorderzähn
und und und und
also und
des hörat ja eigentlich nimmer auf wann i anfang
und
und irgendwann is des dann trotzdem
nur mehr
rock'n'roll gwesn
weil alles agriebm war
was irgendwie da zum
zum holn war
und dann wars guat dass ma geht
also dass i ganga bin
i denk ma
eigentlich
is jedes guate stückl musik
nur a plädoyer
fürs nächste guate stückl musik
und
i denk ma
jeder guate moment
des is jetzt a ziemlich rapider sprung aber
jump baby jump
is eigentlich nur der anlass
naja schwierig
is jetzt schwer zum sagn
es is ja überhaupt schwierig
eigentlich des z sagn
was i da jetzt sagn will
und des loop is jetzt irgendwie
scho so weit drin in mir
also jetzt hab i scho a bissl angst
dass i dann irgendwie
des loop nimmer aussakrieg
aus mir
sie ham ja stoptastn
oder diesen komischen
knopf zum
firetuan
aber i fang jetzt net
über die cd zum lästern an
i geh jetzt einfach zu meim
tee mit rum
ume auf die andre seitn
also hinter die glasscheibn vom studioraum
da is trocken
und da trink i dann in ruhe
mein tee mit rum aus
s war ziemlich zart
und i glaub
s ringen hat si irgendwie in
grenzn ghaltn
ich geh jetzt hier raus
für jetzt geh ich hier raus
ich komm ganz bestimmt wieder
doch jetzt geh ich hier raus